TANGOKONSERT MED SYMFONIORKESTERET VED HØGSKULEN I VOLDA
|
TANGOKONSERT, DANSEKURS OG MILONGA - alt på same helg!
Symfoniorkesteret ved Høgskulen i Volda inviterer til tangokonsert med danseframsyning, søndag 18. oktober 2026 kl 18:00 på Berte Kanutte ved Høgskulen i Volda (Joplassvegen 11) og dansekurs og milonga, laurdag 17. oktober på Uppheim. Det blir ei unik moglegheit til å oppleve tangomusikken som har sitt opphav frå begge sider av elva, Rio de la plata òg kalla for sølvelva, mellom Uruguay og Argentina. Her gjekk det dampskip som spelte musikk med levande orkester. På konserten får de høyre høgskuleorkesteret spele flott tangomusikk av mellom anna den verdskjende tangokomponisten Astor Piazzolla, opphavleg frå Buenos Aires som tok tangomusikken inni dei store konsertsalane og gjorde musikken til lyttande konsertmusikk. Publikum får òg høyre den uruguayanske og truleg den mest kjende av tangovokalistane oppi gjennom, nemleg, komponisten Carlos Gardel. Det er vår eigen Øyvind Skatvedt Robak frå Volda som vil spele på bandoneòn, eit tysk opphavleg instrument som vart svært populært i Uruguay og Argentina og er i dag sjølve hjartet i tangomusikken. Øyvind Skatvedt Robak er òg leiar for tangobandet: Tangolauget som vi òg får gleda av å høyre. Han kan fortelje at det er einaste bandet i Noreg av sitt slag for ungdom, og med landet sin einaste bandoneónelev. Andre høgdepunkt på konserten er flott danseframsyning av Mariano Pignatiello og Aleksandra Kliuchko som vil danse til høgskuleorkesteret. Mariano er opphavleg frå Buenos Aires, Argentina og vaks opp med folkemusikken rundt seg. Han er utdanna teiknelærar og målar og jobbar til vanleg som kunstnar og danselærar i Oslo. Aleksandra Kliuchko, dansepartnaren hans på denne konserten er opphavleg frå Belarus. Hennar reise innan tangodansen byrja då ho ein dag såg eit par danse tango på gatene i Buenos Aires og ho vart fascinert over dansen sin energi, livskraft, og mystikk, at det nærast var umogleg å ta augene frå dei. Dirigenten er: Miki Campins. Han jobbar no som musikkfagleg leiar ved Ålesund kulturskule og er ein aktiv frilansmusikar og dirigent og vi er svært glade for å få han med oss på dette prosjektet. Vi gler oss òg til neste prosjekt, Nyttårskonserten vår i januar som han òg skal dirigere. Ein liten godbit: Laurdag 17. oktober frå kl 17:30-22:00 vert det høve til å lære seg å danse tango med Mariano og Aleksandra på Uppheim i Volda. Frå 19:00-22:00 blir det sosial tangofest/milonga. Her vil Tangolauget stå for store delar av musikken. Meld deg på dansekurset og eller milongaen og ta med deg dansepartnaren din eller berre deg sjølv og dans til Tangolauget og Øyvind S. Robak sitt fantastiske tangospel.Vel møtt til konsert, dansekurs og milonga - alt på same helg! For meir info, sjå nettsida vår: orkesteret.no eller annonse i avisa veka før konsert. For påmelding til milonga: vipps til: 607224, skriv kva kurs du ynskjer å delta på. 17:30-18:15 - Nybegynnerkurs i tango 18:15-19:00 - Litt øva 19:00-22:00 - Milonga Billettpris på dansekurs og milonga: 250 kr per person Du kan kjøpe billettar ved å scanne qr-koda her inne. Vi sel òg i døra, men det kan vere lurt å sikre seg ein plass. |
Foto: Valentina Nieli-Vatne
Foto: Lluis Calm Vidal 
|
