Haustkonsert 2013:

Má Vlast - Requiem
Laurdag 16. november kl 19.00 i Ørsta kyrkje
Sundag 17. november kl 19.00 i Volda kyrkje

Konsert med Symfoniorkesteret, Høgskulekoret og solistar

Program:
Bedřich Smetana: Frå tonediktsamlinga Má Vlast
Wolfgang A. Mozart: Requiem
Dirigentar:
Øyvind Granden Berg
Elizabeth Oltedal
Billettar: Vaksne kr 250, studentar kr 100, born gratis
Má vlast -Bedřich Smetana
Má vlast (Mitt fedreland, JB 1:112) er ein tonediktsyklus av den tsjekkiske komponisten Bedřich Smetana, skriven i perioden 1874–79 og dei ulike satsane vart ikkje urframført samstundes. Heile verket vart framført for fyrste gong 5. november 1882 i Praha. Det består av seks delar, tre av dei, "Høgborgen", "Moldau" og "Frå dei Bøhmiske skogar og sletter" vert framførte på konserten.

Requiem – Wolgang A. Mozart
Rekviem i d-moll (KV 626) av Wolfgang Amadeus Mozart vart komponert i Wien i 1791 og ikkje gjort ferdig før han døydde den 5. desember same året. Verket vart fullført av Franz Xaver Süssmayr og gjeve til grev Franz von Walsegg, som hadde tinga stykket anonymt etter at kona hans døydde den 14. februar. 
Det er eitt av dei mest myteomspunne musikkverka gjennom tidene, særleg omkring kor mykje av stykket som var ferdig før Mozart døydde. Det signerte manuskriptet syner kva som faktisk var ferdig, men ein kjenner ikkje til kor mykje Süssmayr kan ha nytta seg av no tapte utkast for resten av verket. Han hevda sjølv at han skreiv Sanctus og Agnus Dei. Walsegg hadde truleg tenkt å spreie rekviemet som sin eigen komposisjon, som han hadde gjort med andre verk, men dette vart forpurra då enka etter Mozart, Constanze, fekk verket framført offentleg.
 Rekviemet er skrive for to bassetthorn i F, to fagottar, to trompetar i D, tre tromboner (alt, tenor & bass), pauker (to trommer), fiolinar, bratsj og basso continuo (cello, kontrabass og orgel). Vokalen består av sopran-, alt-, tenor- og bass-solistar og eit blandakor.

Solistar:

Karen Rosenberg Olsen
Sopranen Karen Rosenberg Olsen har mastergrad i klassisk song frå Barratt Due Musikkinstitutt og Norges Musikkhøgskole Gjennom sitt 2-årige masterarbeid har Karen jobba med fleire einakters operaforestillingar. I dag er ho med i fleire ulike prosjekt som frilans sopran med konsertar i inn- og utland.
Lars Ivar Nordal
 Tenoren Lars Ivar Nordal byrja syngje på musikklina ved Volda videregående skule. Han har bachelor i klassisk song ved Grieg-akademiet i Bergen hjå professor Harald Bjørkøy. Våren 2013 fullførte han masterstudia i song ved Hochschule für Musik «Hanns Eisler» i Berlin. Han har sunge fleire store operaroller. I Volda har han tidlegare sunge i Händels «Messias» og i Mattheuspasjonen av J. S. Bach.
Alf Vatne
Bass Alf K. Vatne har songutdanning frå Østlandets musikkonservatorium, der han studerte med Joseph Stzerenyi, men han har under heile yrkeskarriera vore lærar ved Ørsta ungdomsskule. Han er mykje nytta som solist i vestlandsfylka, mellom anna ved Opera Nordfjord. I Volda har han tidlegare mellom anna sunge i Bachs Juleoratorium, Händels Messias og Faurés Requiem.
Christoffer S. Johansen
 Kontratenor Christoffer Stenhaug Johansen er 23 år og er musikkstudent ved Høgskulen i Volda. Han er utdanna i drama frå dramalina på Greveskogen Videregående Skole i Tønsberg. Der hadde han regelmessige songtimar med Eva Høgset. Ho overbeviste han om å bli kontratenor. Han har gått på Ringerike Folkehøgskole på Musikk & Teaterlina før han byrja musikkstudia i Volda.