Nasjonal festkonsert

17. mai med Jorun Marie Kvernberg som solist

Tradisjonar er noko ein gjer likt gong etter gong. I  år har me i Symfoniorkesteret ved Høgskulen i Volda bestemt oss for å ta eit avbrekk frå Griegs a-moll. Me har nemleg vore så heldige at Jorun Marie Kvernberg har takka ja til å spele solo med oss 17. mai. Me er stolte over å få spele med ei av dei mest talentfulle kunstnararane i bygda. Sidan det er fele som er  instrumentet hennar skal me spele eit verk av litt nyare dato... nemleg hardingfelekonserten Tri fjordar av Geirr Tveitt. Me gler oss og håper publikum vil verte like begeistra over dette verket som me er.
I tillegg til hardinfelekonserten, får ein høyre kjende og kjære verk av Halvorsen og Grieg og eit knippe satsar frå Hundrad Hardingtonar av Geirr Tveitt.

Stad: Konsertsalen i Kaarstadbygget på Høgskulen i Volda
17. mai 2014
Tid: 20.00


Billettar:
Vaksne: kr 250
Studentar: kr 100
Born under 15 gratis
Ver tidleg ute, her kan verte kamp om plassane!

Jorun Marie Kvernberg (32) hadde sin første soloturné i november 2010, men er slettes ingen nykomar på scena. Sidan endt utdanning på Norges Musikkhøgskule i 2004 har Kvernberg jobba som frilans folkemusikar på heiltid, mellom anna med gruppene Majorstuen, Tindra og Unni Boksasp Ensemble. Som solist er det folkemusikken frå Møre og Romsdal ho ber fram. Kvernberg serverer mellom anna skarpskorne polsdansar og vemodige valsar, sindige bruremarsjar og viltre hallingar. Musikken ber med seg historier om ein pengeforfalskar som må bøte med livet, om ei kyrkje full av mystikk, om ei fele som tryllar fram ungdomsminner og om slåtten som flaut i land etter Tafjordulukka.

Jorun Marie Kvernberg har kandidatstudiet i utøving på fele og hardingfele frå Norges Musikkhøgskole i Oslo. Dei seinare åra har ho også tatt songen i bruk, og ho beherskar den sjeldne teknikken å akkompagnere sin eigen song med felene. Kvernberg har medverka på 16 CD-produksjonar og gav i tillegg ut sin eigen solo-CD i 2006, «Album». Kvernberg vart tildelt Statens Kunstnarstipend for yngre folkekunstnarar i 2009-2010. I stipendperioden har ho satsa på å utvikle seg som solist, mellom anna ved å utvikle ein solokonsert.

Foto:: Marius Beck Dahle

Pressefoto av Jorun finn du her

Bileta over er tekne av: Marius Beck Dahle