Symfoniorkesteret ved Høgskulen i Volda

Orkesteret ved Høgskulen i Volda vart skipa i 1947 av Ingmar Fottland, som var lektor i musikk ved Volda lærarskule. Saman med sentrale musikarar vart symfoniorkesteret starta og har vore i kontinuerleg drift fram til i dag.

Dirigentar etter Ingmar Fottland har vore Thorleif Hauso, Bjarne Dankel, Ivar Torvanger, Nils Ose, Helge Hamsaas, Leif Barmen, Harald Eikaas, Bård Dahle, Rune Bergmann, Øystein Salhus, Øyvind Johan Eiksund, Øyvind Granden Berg, Kjetil Grøtting, Bert Handrick, Miki Campins, Magnar Åm og Elizabeth Oltedal. Sistnemnde har dirigert orkesteret siste åra og er orkesteret sin første kvinnlege dirigent sidan skipinga i 1947

Besetninga er på omlag 35 musikarar med ei fin blanding av bygdefolk, studentar og tilsette ved høgskulen. Ved kvar konsert vert det leigd inn musikarar på instrument orkesteret ikkje har sjølv, for å dekkje det musikalske behovet. Medlemmar i orkesteret betalar kontigent på 250 kr.

Orkesteret har fleire konsertar i løpet av året. Semesteret startar med innøving av studentkomposisjonar som vert framført på 12-konsert i Volda kyrkje i samanheng med forskingsdagane, deretter haustkonsert, nyttårskonsert, vårkonsert og nasjonal festkonsert. I tillegg har orkesteret reist rundt i nærmiljøet og holdt konsert. Symfoniorkesteret har òg  samarbeidsprosjekt med Volda Ørsta Ballettskule og sette opp for aller første gong Nøtteknekkaren op Operahuset Nordfjord, under leiinga av Michael Pavelich og våren 2021 skal orkesteret ha samarbeid med Ålesund symfoniorkester, då under leiinga av Bjarte Engeset.  Orkesteret er kanskje lite, men vi har gjennomføringskraft og stå-på-vilje. Vi har mellom anna spelt Fiolinkonsert nr 1 i A-dur av Ole Bull med Annar Follesø i 2019, Sinfonia Concertante for orkester og blåsekvintett av W.A. Mozart og Vartein Valen sin La isla de la Calmas (2018), Johan Svendsen Norsk kunstnerkarneval og Tidlaus Energi av Magnar Åm (2019), Concierto de Aranjuez av Joaquin Rodrigo med solist Pål Aam (2018) og mange fleire verk som viser at vi kan spele variert musikk frå ulike tidsepokar og stilartar.  Symfoniorkesteret ved Høgskulen i Volda er eit flott orkester å utvikle deg i.  Velkommen!

Nyttårskonsert 2012 i Berte Kanutte-huset (Foto: Berit Buran Jul)

Biletet er teke ved orkesteret si 50 års-markering i 1997

---